Indwara ya Hepatite B : Ibimenyetso byayo ,uko yandura ,uko ivugwa nuko wayirinda

byGatabazi Jean Sauveur -February 06, 2023

1

Indwara ya Hepatite B : Ibimenyetso byayo ,uko yandura ,uko ivugwa nuko wayirinda

Imwe mu ndwara zifata umwijima ni indwara ya Hepatite B , hari n'abayita ,indwara y'umwijima wo mu bwoko bwa B , ni indwara iterwa na Virusi ,ikaba yangiza umwijima bikomeye .

Iyo umwijima wangijwe niyi ndwara , umuntu agira uburwayi bw'igisyo ndetse na kanseri y'umwijima ikaba ishobora kuririraho.

Abantu benshi ahanini ntabwo bazi gutandukanya indwara ya Hepatite B na Hepatite C , nubwo zose zihurira kugutera umwijima kwangirika ariko hari itandukaniro zigira .

Indwara ya Hepatite B kugeza ubu ifite urukingo , naho indwara ya hepatite C nta rukingo igira , uko wivuza izi ndwara zitarakurenga amahirwe yo gukira nta bindi bintu zangije mu mubiri aba ari menshi .

Impamvu zitera indwara ya Hepatite B

Indwara ya Hepatite B iterwa n'agakoko ko mu bwoko bwa Virusi kazwi nka Hepatitis B Virus (HBV)

aka gakoko kandura iyo umuntu akoze ku matembabuzi ava ku muntu urwaye ,aha twaviga inkari ,amaraso , ibyuya nibindi ....

Uko Indwara ya Hepatite B yandura

Indwara ya Hepatite b yandura mu buryo bworoshye burimo

Kwandura binyuze ku kuryamana n'umuntu urwaye
Gusangira ibikoresho bikomeretsanya nk'ibikwasi ,inshinge nibindi...
Umubyeyi ashobora kwanduza umwana mu gihe amubyara
Gukorakora igisebe cyangwa amaraso by'umuntu wanduye kandi utikingiye (utambaye ibikoresho bikurinda)
Kuba waterwa amaraso ava ku muntu ufite ubu burwayi .

Iyo witegereje neza ,usanga indwara ya Hepatite B yandura mu buryo bujya gusa nuko virusi ya Sida yandura .

Ibimenyetso by'indwara ya Hepatite B

Ahanini ,ibimenyetso byiyi ndwara bigaragara hashize ibyumweru 6 kugeza ku mezi 6 wanduye agakoko gatera iyi ndwara . ibyo bimenyetso ni

Guhorana umunaniro
Kuribwa mu nda
Kubabara mu ngingo
Kugira iseseme no kuruka
Uruhu rugahinduka umuhondo cyane cyane mu maso, mu bworo bw'ibirenge no mu ntoki
Inkari zikirabura
Umusarani ukagira ibara risa n'ibumba
Kumva uburyaryate ku ruhu
Kuribwa mu mikaya

Ariko hari abantu batagaragaza ibimenyetso iyo bafite iyi ndwara , ariko muri rusange ibi nibyo bimenyetso byiyi ndwara .

Ubuvuzi bw'indwara y'umwijima

Mu kuvura iyi ndwara , bashyingira ku bukana cyangwa urwego iyi ndwara imaze kugeraho , ahanini ubuvuzi butangwa ni ubu bukurikira

Gutanga imiti ivura indwara ziterwa na virusi zirimo umuti wa lamivudine . umuti wa entecavir na tenofovir , iyi miti ihangana na virusi itera iyi ndwara ndetse ikanayibuza kurushaho kwangiza umwjima .
Kongerera umubiri ubushobozi bwo kwirwanaho no guhangana n'indwara aho bakora ibyitwa Immune based therapy .
Kugirwa inama zo guhindura imibereho zirimo kuruhuka bihagije , kurya neza , kwirinda inzoga nibindi..
Kugusuzuma kanseri y'umwijima kubera ko abantu bafite iyi ndwara ahanini bakunze kwibasirwa niyi kanseri
Gufata urukingo rwa Hepatite B ,izi nkingo ziratangwa cyane cyane zigahabwa n'abana bato .

Ahanini indwara ziterwa na virusi ntizikira , ariko kongerera imbaraga ubushobozi bwo kwirwanirira bishobora gutuma umubiri wivura ubwawo .

Nubwo wahabwa imiti iyi ndwara ntikire ariko ubukana yangizagaho umwijima buragabanuka bityo ukabana nayo kandi nta ngaruka mbi zihambaye iguteje .

Uko wakwirinda indwara ya Hepatite B

Hari ubuyo butandukanye bwagufasha kwirinda indwara ya Hepatite B burimo

Gukoresha agakingirizo ,ukirinda no kuryamana n'umuntu ufite iyi ndwara
Kwirinda gusangira ibikoresho bikometsa nk'ibikwasi ,inzembe nibindi..
Kwirinda gutizanya ibikoresho nk'uburoso cyangwa gusangira inshinge kubitera ibiyobyabwenge
Kwipimisha iyi ndwara mu gihe utwite
Guhabwa amaraso cyangwa kuyongererwa gusa mu gihe uyahawe n'abaganga kandi kwa muganga hemewe.
Gukingiza abana bato , bagahabwa inkingo zose
Kuvuza umuntu ufite ubu burwayi kandi tukamufasha gukurikiza amabwiriza ya muganga

Indwara ya hepatite B ishobora gutera izindi ndwara zikomeye nka kanseri y'umwijima , kwangirika bikomeye ku mwijima , kuba indwara nk'impyiko zakuririraho.

Iyi ndwara yandura ku buyo bworoshye kandi kuyivura biragoye , ni byiza kumenya uburyo yandura nuko umuntu yayirinda , tukitabira gahunda zo kuyikingira cyane cyane tukitabira no gukingiza abana bato ngo bahabwe inkingo zose .